Ka'ayat damihari lagi ma'ieng hi Mantulegang batatap lepuh tulak ne'en. Kude ani ni balalu hamen ka'umma hanye daya puang he'ey ra'erai muneng hang lewu, sadang ineh-ammah here rueh amalem hang pangumean, ekat here rueh sa muneng hang lewu tumpungan yeru.
Anga'an kahaba akal, anni Mantulegang balalu 'angiyuh'ang na eney pada lepuh ne'en kude andri erang kawusi paner pesen Mantulegang; "ari, lah...!! amun haut hampe putut jarau ru die, hanyu muku hang imme. Ada mayaru-mayanai, ada kajut hene kawauhen, aku mamai lepuh ngene pulut"..
Hampe putut jarau, andrau magun ma'ieng sasiruh, bulu hi Mantulegang tulak mamai kakau jarau hampe lawi ni. isa, rueh, hampe saparo didi pulut haut na ene daya Mantulegang, salenga anni ni bulu maharek; "Inun 'sa iwulu-wulu?" eau anni ni. Daya pahakun takut malangar pesen yeru huni bulu sangai Mantulegang; "Wuulu uwi". Balalu anni ni yeru sa tunti-tunti kamulek, wangun ni naan kawauhen anni Mantulegang ru nelang andrau magun sasiruh bulu puang lentah paninungan ni. Hingka iwulu-wulu, isilu-silu, i'ulu-ulu, hampe ipe'e-pe'e...
Hampe akhir ni, kaluar erang ka'ukuy JIN palus nyamm'a anni Mantulegang ru.......
Hi Mantulegang puang min'a, amun anni ni haut wuah culik daya jin Malaberem, hampe luput ene ni didi pulut bulu hanye minau andrau magun ma'ieng.. Wa'u hanye sadar, anni ni haut kungkung jin Malaberem tulak lawit.
Hi Mantulegang nyumput hanruhut wua Muntei (sebangsa limau jumpun) hampe namput karawen-rawen ni bulu nuwe hg wuang umean, ne'u pakai tatulak panan jin alah jumpun.
Lunyak-lunyak hi Mantulegang takia hampe akhir ni lewu ulu panga hujung tumpuk lewu ulun. "Tar..., pungkalung Mantulegang wua Muntei hampi wa'anawang lewu ulun yeru...; "Hiye iru??" eau tunti ulun hingka wuang lewu. "Akuu..., hi Mantulegang, aku ngantara ann'i ku." eau Mantulegang.
Isa, rueh, telu pungkalung Mantulegang wa'anawang lewu ulun hampe naan sa maharek nyang'ai; "Antara nu hampi panga hujung tumpuk naan lewu panga wala hang hujung yaru."
Hi Mantulegang kia eleh hampe hujung tumpuk, hampe lewu sa panga hujung sa eau ulun ru huni. Hi Mantulegang ngaliling lewu yeru nelang tu'u ligar hampe hantelu.
Panampuk ni hi Mantulegang bulu kahaba erang ka'ulun iya sa rahat na kurung hang wuang kann'ang kawat. Hi Mantulegang ngulah pikir akal nampan nyanepah ann'i ni hingka wuang kurungan jin Malaberem, sadang jin Malaberem andri darangan ni Itaqrokoq ganyah mandre. Hi Mantulegang panalu erang ka'ukuy alingeket, bulu laku karawah andri alingeket himpan pakai nyamitus kawat kurungan Malaberem.
Eau Mantulegang hingkan alingeket; "hanyu ada mehet nyamitus kawat yiri die, takut rengei Malaberem pana darangan. Aku ngupa hanyu erang supak widit pakai nu".
"Hayu, kude hanyu pada ngantara akal himpan hi Malaberem ada ngawauh lengan witusan kawat yiti die lah..." sann'gai alingeket..
Hi Mantulegang mi'uk wua Muntei bahimat himpan jin Malaberem puang ka'ule ikirat daya enguh wua Muntei yiru, padingian alingeket ngikit kawat kurungan ann'i ni.
"gerettt, gerett...., tinggg.......," lengan kawat witus wuah kikit alingeket. "Husss, alingeket", ekat eau Malaberem hingka wuang lewu. Dami malengan 'tinggg', palus samm'ung Mantulegang marebe hi Malaberem; "tingggg...., kasuit, gareuk mate Malaberem..... tinggg, kasuit, gareuk mateee itaqrokoq...!!!"
hindra, hanrueh, hantelu, hampe hante luwang kann'ang kawat pa'irah sikak iyuh kaluar anni Mantulegang.
Singkat eau mandru kesah, balalu hi Mantulegang mudi ngenn'ey ann'i ni ma lewu. Sadang pulut hang lawi jarau bulu puang na awang.
Here rueh mudi hampe lewu haut kariwe andrau, ineh andri amm'ah Mantulegang pada mudi ikumpul katuluh.
Jari tanuhuy yeru bariran ma takam, kawan iya bujang. Ada na kampahe amun naan papaneran ulun kawan iya rumis. Daya Allatalla ka'eau : "Hiye isa manurut naun rumis, hanye yeru 'sa kapinu'u ni isa pangahante ni"
----- Tarime kasis ------
aku laku karawah, amun naan haba naun kawan tangke, tanuhuy-tanuhuy sa lain lagi........
Tidak ada komentar:
Posting Komentar